Parke di Fraternan bou di maneho di STINAPA
![](https://static.wixstatic.com/media/ed029c_8f2df6e930bd44aeb6f58f686937b41e~mv2.png/v1/fill/w_59,h_33,al_c,q_85,usm_0.66_1.00_0.01,blur_2,enc_auto/ed029c_8f2df6e930bd44aeb6f58f686937b41e~mv2.png)
Novèmber 2022
Djaweps 10 di novèmber 2022 a tuma lugá firmamentu di akuerdo di Parke di Fraternan. Firmamentu di e akuerdo aki ta un muestra di un bunita ehèmpel kon organisashonnan lokal por traha huntu, den e kaso aki pa sigurá protekshon i traspaso di nos naturalesa.
Fraternan a hasi hopi pa naturalesa di Boneiru. Nan tabata eduká muchanan na skol básiko tokante naturalesa i tabatin un parke kaminda nan tabata planta i kuida mata. STINAPA ta usando e parke, ku ta pertenesé awendia na Fundashon Cas Bonairiano. Ben Oleana a pèrkurá pa esei i a disidí ku ta laga STINAPA manehá e parke. E sitio di e parke ta parti nort den kura di Fundashon Cas Bonairiano. Promé ku e firmamentu a tuma lugá, e konosido siudadano Arthur Sealy a konta poko di e historia di fraternan na Boneiru. Awor pa dilanti STINAPA ta bai atendé ku e parke di fraternan. Fraternan a bai i e tereno a keda. E área ta un laboratorio importante, pa studia i preservá matanan di Boneiru. Pues un bon sitio pa hende siña di dje. “Edukashon di naturalesa ta pa grandi i chikitu. Siña bo mes pa bo sa hopi mas tokante esaki. Mi ta sigur ku e parke ta haña un bon mantenshon pa kontinuashon”, Pierre Perigault Monte a bisa. E ta presidente di STINAPA. Denise Crestian-Coffie tambe a hiba palabra na nòmber di Fundashon Cas Bonairiano. “Awe nos ta aki pa firma un akuerdo pa parke di fraternan. Ya pa hopi aña STINAPA ta uza e parke. E parke ta nèt na e parti nort di nos ofisina di Fundashon Cas Bonairiano. E parke tin un herensia grandi. Pabien na ámbos partido”. Denise a terminá lesando un poesia, skirbi pa su Mama Tante Linda Coffie-Frans.
![](https://static.wixstatic.com/media/ed029c_d2ac3e77bb454c749e4f100ea3907eea~mv2.jpg/v1/fit/w_207,h_206,q_75/ed029c_d2ac3e77bb454c749e4f100ea3907eea~mv2.jpg)
![](https://static.wixstatic.com/media/ed029c_9227776e0a0742bf8b409ab2fc5126a5~mv2.jpg/v1/fit/w_207,h_206,q_75/ed029c_9227776e0a0742bf8b409ab2fc5126a5~mv2.jpg)
![](https://static.wixstatic.com/media/ed029c_8f2df6e930bd44aeb6f58f686937b41e~mv2.png/v1/fit/w_206,h_206,q_75/ed029c_8f2df6e930bd44aeb6f58f686937b41e~mv2.png)
![](https://static.wixstatic.com/media/ed029c_0d26f8a1cfa1441b81951bf850d5b341~mv2.jpg/v1/fit/w_207,h_206,q_75/ed029c_0d26f8a1cfa1441b81951bf850d5b341~mv2.jpg)
![](https://static.wixstatic.com/media/ed029c_7c767e222cd34bf5b31899e934d3b768~mv2.jpg/v1/fit/w_207,h_206,q_75/ed029c_7c767e222cd34bf5b31899e934d3b768~mv2.jpg)