Riba invitashon, tira un bista na sitio di konstrukshon huntu ku miembronan di Konseho Insular i di Kolegio Ehekutivo
Novèmber 2020
Riba invitashon di FCB e bùs ta buska miembronan di Konseho Insular, Kolegio Ehekutivo i miembronan di prensa pa huntu hasi un bishita na e sitio di konstrukshon di e kasnan nobo. Na kaminda e mènedjer di Sekshon Tékniko di FCB ta duna splikashon di e proyekto di 500 kas di hür sosial. E delegashon por a mira e desaroyonan pa loke ta trata e kasnan i e infrastruktura miéntras ku nan preguntanan tabata haña kontesta.
Despues di esaki a sigui ku un bishita na e sitio na bario Hato, kaminda ku lo konstruí 204 kas. Ta konosí ku e aktual habitantenan di Hato no ta kontentu ku konstrukshon di kasnan sosial den nan serkania, loke ku a trese tardansa den traspaso di e tereno. Pesei FCB ta haña ku miembronan di Konseho Insular i di Kolegio Ehekutivo mester ta bon informá. Pa nan mira i tende ku FCB lo realisá un bario balansá, teniendo kuenta ku e parti ya eksistente.
