Inspektor di bario

E inspektor di bario / bario habitabel

E inspektor di bario ta forma parti di e tim di 'Woondiensten' i e ta un konekshon importante entre paden i pafó. E ta responsabel pa ehekushon di trabounan di inspekshon i kontròl. E ta aportá na solushon di molèster, situashonnan problemátiko i ta yuda hasi barionan mas habitabel. E ta señalá situashonnan iregular i ta tuma akshon pa remediá esakinan. E ta aktua komo 'wowo i orea' den e bario.

E inspektor di bario ta aportá aktivamente na tene nos barionan limpi, hinté i seif i dunando bon impreshon. Meskos ta konta pa henter e besindario i tambe e ta tene kontakto ku habitantenan pa promové barionan mas habitabel. Esaki ta ser lográ entre otro dor di mas supervishon i mantenshon, pero tambe dor di tin bon bista riba kalidatnan físiko i sosial di e bida i permanensia den e bario. E ta presentá komo kara i punto di kontakto di FCB, e ta pèrkurá pa e hürdónan tene nan mes na palabrashonnan i e ta duna nan informashon.

E inspektor di bario ta tur dia físikamante presente den e barionan i e ta papia ku hürdónan. Dor di papia, splika i motivá nos ta purba konsientisá nos hürdónan di e importansha personal i general di un bario limpi, hinté i seif. Ku aksento riba e kuránan.

E maneho di limpiesa di FCB a bira mas rigoroso. Si no duna oído na e atvertensianan, FCB lo laga e hürdó sa ki dia e grupo konsistiendo di e dùrwarder, polis di bario i kompania di limpiesa, bou di guia di FCB lo aktua i limpia e kurá pa kuenta di e hürdó. Mayoria hürdó ta tene nan kurá limpi.

Periódikamente, segun un skema trahá adelantá, nos ta laga pone konteinernan di sushi den e barionan pa stimulá e hürdónan pa hasi limpiesa. E inspektor di bario ta aktua segun e kondishonnan general di hür, ankrá den e kontrato di hür di FCB.

Pártnernan di interes

Anualmente ta organisá akshonnan di limpiesa den e barionan di FCB, huntu ku e diferente pártnernan di interes, entre nan polis di bario, Selibon, Dierenbescherming, Stichting Dierenhulp, Direktorado R&O (pa kaminda i espasionan públiko) i Direktorado Supervishon i Mantenshon.