Huntu ku hürdónan
E hürdónan ta nos pártnernan mas importante. Tin hürdónan ku riba propio inisiativa anualmente ta organisá akshonnan di limpiesa den nan bario. Frekuentemente ta repartí folder i flayernan kas pa kas den kua ta duna tepnan balioso riba diferente tópikonan di interes. Segun nesesidat ta hasi bishita na kas serka hürdónan. Hürdónan por kana drenta na FCB, por bèl òf whatsapp, meil òf nan por aserká e inspektor di bario ku nan petishonnan.  FCB ta usa medionan di komunikashon (korant, tv i radio) pa informá hürdó- i interesadonan. Embolbimentu den direkshon di e hürdónan ta traha hopi positivo. Nan mester sinti ku nan ta ser skuchá i efektivamente, te kaminda ku ta posibel, duna oído na nan pregunta-, petishon- òf ideanan.

Huntu ku Gobièrnu lokal (OLB) i Ministerionan di Reino
"Gobièrnunan di Bonaire i di Reino ta masha importante den maneho di FCB. Kontakto regular i palabrashonnan di trabou ta nesesario pa atendé asuntunan koriente, palabrashonnan hasí i/òf proyektonan. E 'Woonteam' ta un ehèmpel di koperashon mútuo entre FCB, OLB i SZW (RCN/Reino), kaminda ku huntu ta trata na evitá ku ta saka hürdónan for di kas. Esaki dor di intervenshon pa entre otro yudansa pa maneho di debe, informashon enkuanto presupuesto i guia.Tur aña e diferente ministerionan na Den Haag ta haña bishita di FCB."

Traha huntu ku organisashonnan sosial
Den esaki nos ta pensa riba organisashonnan manera Integrale Wijk Ontwikkeling (IWO), Mental Health Caribbean (MHC), Krusada, Reclassering èts. Kontaktonan pa hasi nos barionan mas habitabel, pa trata asuntunan ku ta regardá nos hürdónan òf pa sera akuerdonan di koperashon i/òf konstruí edifisionan pa e diferente gruponan di enfoke. Di otro banda tambe kontaktonan ku WEB, TELBO, Flamingo TV ètsétera pa negosashonnan pa sierto proyekto.

Traha huntu ku Fundashonnan di kas kolega
E koperashon ku e fundashonnan di kas den region ta kana via e asosiashon CANEYE. CANEYE tin komo meta pa trata e interesnan komun di e diferente fundashonnan i pa promové e kontaktonan mútuo na fabor di bibienda popular den su mas ámplio sentido di palabra den anterior Antias Hulandes. Ta siña di otro i por sostené otro. Tambe FCB tin un relashon di trabou ku e fundashon 'thuis na Eindhoven', Hulanda. Ta trata di koperashon riba tereno di interkambio di konosementu i eksperensia, banda di apoyo riba tereno di maneho. Empleadonan di FCB ta bai kore stazje na 'thuis i nan tambe ta bin Bonaire pa akí duna nos e sosten nesesario.

Huntu ku empleadonan
E diferensha pa e éksito di FCB ta sinta pesei tambe den e faktor humano. E 'ser ún tim' ta importante pa FCB. E desaroyo profeshonal di e empleadonan i nan satisfakshon na trabou ta halsa funshonamentu i ku esaki e resultado di e organisashon. Esakinan ta hopi dependiente di e kompetensianan i dedikashon di e empleadonan. Ta trata di logra integralidat; hasi konekshon ku otro terenonan di trabou, dedikashon i koperashon tantu ku koleganan di bo propio tim komo ku di otro timnan. Ta importante ku e empleado ta bai sinti su mes responsabel komo parti di e totalidat; ser konsiente ku kada empleado, riba su tereno di trabou, mester aportá na éksito di e organisashon. Krese huntu i realisá metanan huntu.