top of page

FCB / Enkuanto nos / Mishon i vishon

Mishon "Building Together"

Komo e úniko fundashon pa bibienda popular riba Bonaire, Hulanda Karibense, nos tin komo vishon pa Fundashon Cas Bonairiano (FCB) hunga un ròl sentral den e komunidat boneriano dor di, na un manera empresarial i profeshonal ofresé kasnan (sosial) pa hür òf kumpra di kalidat duradero, pagabel i di bon kalidat. Tur esaki na personanan ku riba propio forsa no por yega na un dak riba nan kabes, prinsipalmente habitantenan ku entrada abou i medio i tambe gruponan di enfoke spesial.

E foko ta pa, ku un organisashon profeshonal i finansieramente salú, sòru pa bibienda pa habitantenan di Bonaire. Ofresé sufisiente kasnan pagabel den barionan agradabel pa biba i ku ta kumpli ku eksigensianan di e tempu aktual i di e habitantenan. Den esaki nos ta pensa riba bon infrastruktura, konekshon di internèt, durabilidat banda di skol/akohida pa mucha, sentronan di bario, posibilidat pa rekreashon den barionan i pa den futuro serkano traha riba e posibilidat pa energia mas efisiente. Esaki nos ta para p'e.

Ofresé kasnan duradero, di bon kalidat i pagabel, barionan mas habitabel i seif ta aktividatnan básiko di nos fundashon. Sigui aktivamente en buska di posibilidatnan i wak kiko por mihó, òf kiko ta nesesidatnan di nos gruponan di enfoke i traha dirigí riba esakinan.

Pagabel ta nifiká ku nos ta invertí un gran parti di nos medionan pa prinsipalmente e famianan mas vulnerabel i gruponan di enfoke mas spesial. I ku den esaki pagabel ta na promé lugá. Ta importante ku hendenan di ménos rekurso tambe por biba na un manera humano. Tòg ta tarea di FCB pa pèrkurá pa esnan ku riba propio forsa no por yega na bibienda apropiá.

Un dak riba bo kabes ta di sumo importansha pa bienestar di e habitantenan. Dor di ofresé proyektonan 'na midí' esaki ta kontribuí na hasi e bario mas habitabel, hisa e kalidat di e alrededor i e plaser pa biba di hürdó i/òf kumpradónan individual (biba protehá i seif).

Nos lema "Building Together" ta para pa traha huntu na bibienda riba Bonaire. Konsiente di ku siendo nos so, nos no por logra nos mishon, nos ta invertí den un bon relashon ku tur gruponan di interes direkto i pártnernan di interes manera OLB, Reino (ministerionan na Hulanda) i instanshanan sosial pa na un manera embolbí i dirigí riba resultado por ehekutá e tareanan primordial di FCB.

Mantené un organisashon chikitu i kla, pero tambe efisiente, habrí i transparente pa por duna un bon servisio i pa usa e rekursonan sosial optimalmente pa bibienda popular pa e habitantenan di Bonaire.

Vishon

Riba e pregunta pa kiko nos organisashon ta para, nos ta mira bèk riba e "Volkshuisvestingsverordening Bonaire" den kua FCB a haña e siguiente tarea: ku un organisashon profeshonal i finansieramente salú, na un manera amabel pèrkurá pa bibienda pa habitantenan di Bonaire i prinsipalmente esnan ku riba propio forsa no por yega na un dak riba nan kabes. Dor di ofresé sufisiente kasnan pagabel den barionan agradabel pa biba i ku ta kumpli ku eksigensianan di e tempu aktual i di e habitantenan.

Meta

E organisashon lo no sirbi ningun otro meta ku no ta traha na interes di bibienda popular. Realisashon di metanan sosial ta pará dilanti, ku kontinuïdat finansiero di e organisashon komo kondishon.

E fundashon ta trata na logra e meta aki ku e kapital destiná pa esaki dor di:

  • konstruí i mantené kasnan pagabel i agradabel pa biba aden;

  • kumpra, destiná, hür, atministrá, drecha, grava ku hipotek, bende, destruí, desaroyá, eksplotá, parti, posedé i renobá kas i otro ophetonan;

  • hiba un maneho hustu di hür i asignashon;

  • koperá pa mantené un bon ambiente pa biba aden;

  • promové un bon klima di bida dor di trabou sosial den bario;

  • optimalisashon di e relashonannan ku e habitantenan i nan representashon;

  • traha huntu ku organisashonnan similar ku por ta establesé tantu lokal, regional komo den Reino Hulandes promové un bon prestashon di servisio na e hürdónan;

  • destiná tur otro medionan huisioso pa yega na e meta poné;

  • pèrkurá pa e rendimentu sosial, "Social Return of Investment".

Komo ku FCB so lo no por hasi esaki, gostosamente nos ta traha huntu ku diferente 'stakeholder'nan manera hürdónan i/òf asosiashon di hürdónan, pártnernan sosial, fundashonnan di bibienda kolega den regio i na Hulanda, pártnernan sosial i ministerionan na Hulanda, prinsipalmente e Ministerio di Asuntunan Interno i Relashonnan den Reino (BZK).

bottom of page