E seis fundashonnan di kas di e anterior Antia Hulandes ta forma huntu e asosashon CANEYE ku su meta ta di sirbi interesnan di bibienda en general i di stimulá e interkambio i kontaktonan entre nan na benefisio di bibienda den e sentido mas ámplio. E meta aki e asosashon ta purba logra entre otro dor di interkambio di konosementu i eksperensia riba tereno di organisashon, bibienda, informashon i entrenamentu. Durante dos dia nan a sigui kurso na Rotterdam, a bishitá fábrika di kas prefabriká na Amsterdam i Utrecht, a bishitá un fundashon di kas na Eindhoven i a presensiá den práktika ehekushon di e vishon di bibienda i akuerdonan di prestashon, banda di bishitá proyektonan.