Tabata importante pa mantené e karakter i identidat di e sentro di bario. Ta pesei e
pinturanan ku tabatei kaba mes a keda renobá. Ghislain Monte a renobá e pintura
parti paden di e sentro, originalmente di Frans Booi i Nòchi Koffie a duna su propio
pintura, pafó na entrada di e sentro, un retoke.
E sentro no solamente a keda bunita, sino tambe e ta un sentro di bario ku ta
aksesibel i usabel pa diferente aktividat i tambe diferente grupo di enfoke. E kurá ta
ful na klenku i tin espasio kreá pa grandi i chikí bini huntu pa sosialisá den un
ambiente sano den e bario di Nikiboko. Tin un kancha di bolas i otro kancha
multifunkshonal pa deporte. Lo bini tambe un area ku kos di hunga, ‘speeltuin’, pa
asina e mucha chikitunan tambe tin nan propio espasio pa hunga i dibertí.
E kurá kompletu ta bunita yená ku klenku i mueblenan duradero pa patio. Segun e
palabrashonnan, lo bini lus tambe pa asina hasi e sentro di bario mas usabel. Na
kaminda a opta pa hasi mas ahuste ku tabata planiá, asina hisando e kalidat di e
sentro aki mas. Banda di esaki tabatin materialnan ku a yega mas lat, debí na e
pandemia. Esakinan tabata motibu ku e trabounan a kana un poko mas lat ku a
plania.
Awor ta hasiendo e trámitenan pa un djis kuminsá ku renobashon di e sentro di bario
na Tera Kòrá. Fundashon Cas Bonairiano ta pará kla pa sigui hasi kosnan bon den e
komunidat boneriano.