top of page

Fundashon Cas Bonairiano ta urgi su buskadónan di kas pa hasi nan re-inskripshon pa 2025

Febrüari 2025

Den luna di febrüari 2025 tin oportunidat pa tur persona òf famia ku ta riba e lista
di espera pa un kas di FCB hasi nan re-inskripshon pa 2025.

Tur aña mester renobá e inskripshon pa keda aktivo riba e lista di espera. Hasiendo
e re-inskripshon akí ta un señal ku e persona òf famia ta interesá i tin nesesidat
ainda pa un kas di hür di FCB. Na mes momentu tin ku update datos i registrá
kambionan manera por ehèmpel si a haña un yu aserka, kambio di trabou i salario,
kambio den entrada di esnan ku ta bai biba den e kas, kita nòmber di e yu ku a bai
studia afó, fayesementu di un famia ku ta registrá èts.

Ta hopi importante pa e informashon di e persona òf famia ta kompleto i korekto
registrá na FCB pa por determiná ki tipo di kas e persona òf famia mester haña.
Tur persona ku a registrá kaba i tin un kuenta di Mi FCB lo risibí un notifikashon
entrante 3 di febrüari awor via e imeil ku a usa pa traha e kuenta di Mi FCB. Mester
drenta e kuenta di Mi FCB i klik riba re-inskripshon pa kuminsá e proseso. Kòrda ku
un persona ku ta inskirbi kaba pero no tin un kuenta di Mi FCB traha, MESTER traha
un kuenta di Mi FCB via e wèpsait www.fcb.live pa por re-inskribí pa 2025.

FCB ta keda enfatisá ku ta importante pa tur informashon ta korektamente yená.
Banda di esaki mester di sédula ku no a kaduká i komprobante di entrada di TUR
hende ku ta registrá huntu ku bo. Pa muchanan ku no tin sédula ainda, por usa un
foto di pasport òf buki di yu. Si ta traha, mester pone slep di salario di luna di
yanüari 2025. Personanan ku AOV/AOW i òf ònderstant mester pone un
komprobante no mas bieu ku 3 luna. Si tin entrada di djòp i òf alimentashon, ta
pone un komprobante di esaki(nan) tambe.
Durante e luna di febrüari FCB lo bolbe manda imeil komo rekordatorio. Pero kada
persona òf famia ta responsabel pa nan inskripshon i re-inskripshon na FCB.
Entrante luna di mart, si ainda no a traha e kuenta di Mi FCB òf tin Mi FCB pero no
a hasi e re-inskripshon, e persona òf famia lo pasa over outomátikamente riba un
lista di inaktivo i lo no por reakshoná riba kasnan disponibel pa hür, te na momentu
ku FCB risibí e re-inskripshon i esaki keda aprobá.
Pa esnan ku mester di yudansa pa traha e kuenta di Mi FCB i hasi e re-inskripshon
mesora, por pasa riba dianan 3, 4, 5 òf 6 di febrüari 2025 na ofisina ku TUR
informashon aktualisá manera sédula i komprobantenan di entrada pa por keda
yudá.
Pa esnan ku tin un kuenta di Mi FCB i ku kisas a kumpra òf traha kas propio kaba,
no ta biba na Boneiru mas òf debí na kualke otro motibu no ta interesá den un kas
di FCB mas, por primi un boton den e re-inskripshon pa por wòrdu kitá for di e lista
di espera.

Esnan ku nunka a traha un kuenta di Mi FCB, ku a yega di inskribí na FCB pero no ta
interesá mas pa ta riba e lista di espera, por fabor manda un imeil na
[email protected] ku e petishon pa kita for di riba e lista di espera.

bottom of page